کراچی سے فی الحال ٹرین نہیں چلے گی، وزیر ٹرانسپورٹ سندھ

سندھ کے وزیر ٹرانسپورٹ اویس شاہ نے واضح کیا ہے کہ کراچی سے فی الحال ٹرین نہیں چلے گی۔

ان خیالات کا اظہار انہوں نے وفاقی وزیر ریلوے شیخ رشید احمد کی پریس کانفرنس کے رد عمل پر بیان دیتے ہوئے کیا۔

صوبائی وزیر اویس شاہ کا کہنا تھا کہ ہمیں عوام کی فکر ہے اور آپ کو ٹرین کی فکر ہے۔

انہوں نے کہا کہ ٹرینیں چلیں تو پھر کورونا وائرس پر کنٹرول کرنا مشکل ہوجائے گا۔

اویس قادر شاہ کا کہنا تھا کہ شیخ رشید کو عوام کی زندگیوں کی فکر کم اور ٹرین چلانے کی فکر زیادہ ہے۔

صوبائی وزیر نے یہ بھی کہا کہ شیخ صاحب آپ صوبے کے محتاج نہیں تو صوبے بھی آپ کے محتاج نہیں ہیں۔

واضح رہے کہ وفاقی وزیر ریلوے شیخ رشید احمد نے کہا تھا کہ وہ کسی وزیراعلیٰ یا چیف سیکریٹری کے محتاج نہیں ہیں۔

ان کا یہ بھی کہنا تھا کہ وزیراعظم کی منظوری کے بعد ملک بھر میں ٹرینیں چلانے کا آغاز کر دیا جائے۔