ہارون کو لاک ڈاؤن ختم ہونے کی اتنی جلدی کیوں؟

لاک ڈاؤن کے جلد ختم ہونے کا انتظار کرنے والے پاکستان میوزک انڈسٹری کے معروف گلوکار ہارون رشید کا کہنا ہے کہ اُنہیں اپنی داڑھی بنائے ہوئے 10 دن گُزر گئے ہیں۔

حال ہی میں ہارون رشید نے فوٹو اور ویڈیو شیئرنگ ایپ انسٹاگرام پر اپنی 2 تصاویر شیئر کیں جس میں پہلی تصویر میں ہارون کے چہرے پر ہلکی داڑھی موجود ہے جبکہ دوسری تصویر میں وہ کلین شیو ہیں۔

انسٹاگرام پر شیئر کردہ اِن تصاویر کے ساتھ ہارون رشید نے اپنے مداحوں کو اپنی’ لاک ڈاؤن روٹین ‘سے بھی آگاہ کیا۔

ہارون رشید نے لکھا کہ ’10 دن ہوگئے ہیں اور میں نے اپنی داڑھی نہیں بنائی کیونکہ میں لاک ڈاؤن میں ہوں اور اِس دوران میرا کہیں آنا جانا نہیں ہو رہا ہے۔‘

گلوکار نے لکھا کہ ’لاک ڈاؤن سے پہلے مجھے روزانہ ہی ٹی وی شوز اور دیگر سرگرمیوں کے لیے کہیں نہ کہیں جانا پڑتا تھا جس کے لیے میں ہر وقت اپنی داڑھی بنا کر رکھتا تھا۔‘

آخر میں اُنہوں نے اپنے مداحوں سے اُن کی رائے دریافت کرتے ہوئے سوال کیا کہ ’آپ داڑھی والے ہارون کو پسند کریں گے یا کلین شیو والے ہارون کو؟

اِس سے قبل نامور گلوکار و سماجی کارکن شہزاد رائے نے لاک ڈاؤن کے دوران حجام کی دُکان بند ہونے کی وجہ سے خود ہی گھر میں حجامت شروع کردی تھی۔

شہزاد رائے نے اپنی ایک انسٹاگرام پوسٹ میں لکھا تھا کہ ’کوویڈ 19 نے ہمیں کہیں کا نہیں چھوڑا، بڑی مشکل سے میں نے گھر میں اپنے سَر کے بال کاٹ لیے ہیں اور اب میرے سَر کا بوجھ ہلکا ہوگیا۔‘

یاد رہے کہ کورونا وائرس کے پھیلاؤ کو روکنے کی وجہ سے جاری لاک ڈاؤن کے پیش نظر حکومت کی جانب سے حجام کی دُکان کھولنے پر بھی پابندی عائد کی گئی ہے۔

حکومت کا کہنا ہے کہ حجام کی دُکان اور بیوٹی پارلرز پر لوگوں کا رش زیادہ ہوتا ہے اور یہاں سے کورونا پہلے کا خدشہ زیادہ ہے۔