گڈاپ میں ٹڈی دل کا فصلوں پر حملہ

اندرون سندھ میں مختلف علاقوں میں تباہی مچانے کے بعد ٹڈی دل کراچی کے مختلف علاقوں میں داخل ہوگئے ہیں۔ ٹڈی دل نے گھروں اور فصلوں پر حملہ کردیا۔

کراچی کے علاقے گڈاپ ٹاؤن میں ہزاروں ٹڈی دل داخل ہوگئے۔

علاقہ مکینوں کا کہنا ہے ٹڈی دل نے اچانک گھروں اور فصلوں پر حملہ کیا۔

شہریوں نے کہا کہ حکومت سے اپیل کرتے ہیں کہ جلد از جلد ٹڈی دل کے خاتمے کے لیے اسپرے کروائے ورنہ گزشتہ برس کی طرح ان کی فصلیں تباہ ہوجائیں گی۔

دوسری جانب ٹڈی دل میرپورخاص اور عمرکوٹ کے بھی بعض علاقوں داخل ہوگئی ہے جس کے باعث کاشتکار بے بسی کے عالم میں حکومتی مدد کے منتظر ہیں۔

یہ بھی پڑھیے: ’’ٹڈی دل کے خاتمے کے لیے ملک بھر میں اسپرے کیا گیا‘‘

کاشتکاروں کے مطابق ٹڈی دل ضلع میرپورخاص کی تحصیل ڈگری کے گاؤں خان محمد جسکانی اور گردونواح میں داخل ہوئی ہے۔ 

ٹڈی دل کے حملے کی شکایات پر محکمہ زراعت کے اہلکاروں نے متاثرہ علاقوں کا دورہ کیا اور کاشتکاروں سے معلومات حاصل کیں۔ 

چند روز قبل ضلع سانگھڑ کے مختلف علاقوں میں بھی ٹڈی دل نے حملہ کیا تھا۔ کاشتکاروں کا کہنا ہے کہ کسی بڑے نقصان سے قبل ٹڈی دل سے بچاؤ کیلئے فوری فضائی اسپرے ہی واحد حل ہے۔