بھارتی فوج کشمیر میں پیلٹ گنز کا استعمال کررہی ہے، وزیر اعظم

وزیر اعظم عمران خان کا کہنا ہے کہ بھارتی افواج مقبوضہ کشمیر میں بچوں اور خواتین کے خلاف پیلٹ گنز استعمال کر رہی ہے، جبکہ بھارت نے مقبوضہ کشمیر میں غیر انسانی لاک ڈاؤن کیا ہوا ہے۔

اپنے ٹوئٹر اکاؤنٹ پر ایک پیغام میں وزیر اعظم عمران خان نے کہا کہ مقبوضہ کشمیر میں مودی کا آر ایس ایس سے متاثرہ نظریہ بالکل واضح ہے۔

انہوں نے کہا کہ پہلے غیرقانونی الحاق سے کشمیریوں کو ان کے حق خود ارادیت سے محروم کرنا ہے، دوسرا ان سے انتہائی غیر انسانی سلوک کرنا اور تیسرا طاقت کا بہیمانہ استعمال ہے۔

وزیراعظم نے کہا کہ کشمیری خوراک اور ادویات جیسی بنیادی ضروری اشیا سے محروم ہیں۔

عمران خان نے کہا کہ کشمیریوں خصوصاً نوجوانوں کی بڑی پیمانے پر گرفتاریاں کی جارہی ہیں۔

واضح رہے کہ مقبوضہ کشمیر میں بھارتی فورسز نے ریاستی دہشتگردی جاری رکھتے ہوئے دو کشمیری نوجوانوں کو شہید کر دیا۔

بھارتی فورسز نے جموں کے ضلع ڈوڈا میں محاصرے اور سرچ آپریشن کے دوران دونوں کشمیری نوجوانوں کو شہید کیا۔

اس سے پہلے اسی علاقے میں عسکریت پسندوں سے جھڑپ کے دوران ایک بھارتی فوجی بھی مارا گیا تھا جبکہ علاقے میں بھارتی فورسز کا سرچ آپریشن جاری ہے۔